Poema Kortiko

Aruba

Custumber

Banda di Lama

Alaba bo bida

Alaba bo bida tur dia
Alaba bo alma cada rato
Alaba amor y buniteza

Nos bida ta bunita
Hende ta bunita
Nos creencia ta bunita

Bida ta fabuloso
Bida ta grandioso
Amigonan ta cariñoso
Y mi famia ta e mas valioso

Mi ta stima mi bida
Mi ta contento cu mi ser
Mi tin un paar di amigo tremendo
Y mi kier laga nan tur sa
Cu boso ta den mi pensamento

E bunita solo cu Dios ta lusa nos cu ne
E nechi luna cu nos ta ‘namora bou dje
E bunita cultura cu mi a nace aden

Ta cosnan pa gradici y no lubida
Tin biaha cosnan ta bai malo
Pero cuanto cos bunita tin rond di dje

Ami ta purba na no lubida
Y mi ta pidi boso mescos

Bo sa no…….
Keremi, mi ta bisabo
Cu bida ta bunita
Y bo sa con mi por asegurabo?

Bai wak den spiel !
Mas evidencia…..
Mi no por dunabo

Abo a dunami speransa
Ta abo a lagami wak luz atrobe
E melodia bunita cu mi ta scucha henter dia
Ta door dibo e la cuminsa
Danki na abo
Mi destino ta parce mucho mas agradabel
Cu bo cariño y actitud mi tin confiansa den mi futuro

Pasobra, mi á conocebo!
Mi ta kere bek den hende
Ora mi djis wak bo nomber scirbí
Of ora mi pensa riba bo wowonan
Mi ta hanja un sonrisa cu ta keda henter dia

Bida ta stranjo pero bunita
Facil y complica
E simpel hecho awor aki ta
Cu mi a hanja pa conocebo
Mi a mishi cu bo mannan, cu bo cabey, cu bo cara
Mi a cana band’i bo, bo a drumi band’i mi
Mi a wak bo cu bo wowonan sera
Ta hopi dushi mes bo ta!

Pa basta tempo mi a kere cu no,
Pero ta berdad, mi mag tin speransa
Pasobra abo ta existi…..

(For Boujou)

Den mi pensamentonan awe……

Con bo por cobra un bida di un creacion di Dios
Con bo por pone un prijs na stimashon
Con bo por reemplaza un amor verdadero
Con bo por stop di stima ora e no tey mas

Nos ta perde diferente cos den bida
Cosnan grandi cosnan chikito cosnan importante y cosnan supuestamente sin valor

Ken abo ta pa bisami no worry
Ken bo ta kere bo ta, pa bisami laga los

Ta ami cu mi tristeza tin di sinta cu otro y refleha
Ta ami cu duele tin di cobersa y jega na un acuerdo
Ta ami cu mi sentimientonan tin di busca e berdad

Abo no bin lesa e les pami
Abo no bin bisami kiko ta bon pami of no
Abo no bin hunga e salbador cu e contesta ganador
Abo no hasi manera bo ta e creador

Silencio tin biaha ta e mihor contesta
Un contesta tin biaha ta hasi e situacion pio

Lagami cu mi tristeza lagami cu mi duele

Si ta yuda bo kier yudami,
Para bandi mi y wanta mi man
Wanta mi man y scuchami
Scuchami y purba comprondemi
Purba comprondemi y stimami

Keda keto y stimami
Keda keto y wanta mi man
Keda keto y comprondemi
Keda keto bandi mi

Mas comprenshon y yudansa min’ por pidi,
di ningun forsa, hende of cualkier cos.
Si bo ta djis bandi mi,
mesun cos cu biento ta waya semper bandimi,
e biento sa ki ora di ta suave ki ora e mester ta fuerte

Para bandimi mesun cos cu solo ta brilla y keinta
Paso solo sa bon bon, ki ora pa kima mi cuero y ki ora e djis lusa riba dje
Para firme bandi mi mesun cos cu mi sombra tey semper

Keda keto y para bandi mi si bo kier
Si bo kier, ta asina bo por judami
Judami compronde e situacion y mi sentimientonan
Djis keda keto y wanta mi man
Wanta mi man mi sinti bo calor
Bo calor y bo bon energia
Si ta amor bo tin pami ta asina lo mi sintie
Djis ta bandi mi, wanta mi man y keda keto
Lagami scucha bo pensamentonan via bo rosea
Wanta mi man y keda keto
Keda keto y stimami si bo kier

Ami kier
Ami kier